Kev Muaj Mob COVID Mus Ntev

Kev Muaj Mob COVID Mus Ntev yog dab tsi?

Kev Muaj Mob COVID Mus Ntev tuaj yeem tshwm sim tau tom qab ib tug neeg twg muaj Tus Kab Mob COVID-19. Nws yog tus kab mob kho zoo tsis tu qab, txhais tau tias nws yuav siv sij hawm ntev thiaj li kho zoo, thiab/los sis tuaj yeem tshwm sim thiab ploj mus thaum sij hawm dhau mus. Qee zaum nws hu tias yog "tus tsos mob tom qab muaj kab mob COVID", "tus zwj ceeb mob tom qab muaj Tus Kab Mob COVID-19 (PCC)" los sis "Tus Kab Mob COVID ncua ntev".

Kev Muaj Mob COVID Mus Ntev yog ib qho kev txhawj xeeb txog kev noj qab haus huv rau pej xeem loj heev uas tau cuam tshuam rau ntau lab leej neeg laus thiab cov me nyuam yaus nyob hauv Teb Chaws Meskas. Cov tsos mob tuaj yeem muaj cov tsos mob txij li mob me ntsis mus rau mob hnyav thiab yuav siv sij hawm tsawg kawg yog ntev txog peb lub hlis mas thiaj li yuav zoo. Hauv qee cov neeg mob, Tus Mob COVID Mus Ntev tuaj yeem ua rau muaj kev xiam oob qhab tau.

Tseem muaj ntau yam tseem tsis tau paub txog Tus Mob COVID Mus Ntev vim tias nws yog ib qho tsos mob tshiab. Tus kab mob vais lav SARS-CoV-2 uas ua rau muaj Tus Kab Mob COVID-19 raug tshawb nrhiav pom thawj zaug nyob hauv xyoo 2019. Peb tseem yuav kawm kom paub ntau txuas mus ntxiv thaum uas kev tshawb fawb txuas mus ntxiv.

Cov Tsos Mob ntawm Tus Mob COVID Mus Ntev

Cov tsos mob ntawm Tus Mob COVID Mus Ntev tuaj yeem siv sij hawm ntev txog ntau lub hli los sis ntau xyoo tom qab kis tau Tus Kab Mob COVID-19 thiaj li zoo. Cov tsos mob tuaj yeem sib txawv ntawm ib tug neeg mus rau ib tug thiab yuav paub tau los sis kuaj tau nyuaj.

Raws li Centers for Disease Control and Prevention (CDC, Cov Chaw Hauj Lwm Tswj Hwm thiab Tiv Thaiv Kab Mob), muaj ntau tshaj 200 cov tsos mob ntawm Tus Mob COVID Mus Ntev. Cov tsos mob yuav mob hnyav zog tuaj tom qab rau siab ntso siv zog ua los sis xav. Cov tsos mob uas keev pom tshaj plaws muaj xws li:

  • Sab nkees uas cuam tshuam rau kev ua neej txhua hnub
  • Feem ntau hnov tau tias tsis xis nyob (zoo ib yam li yuav piav tau nyuaj) tom qab rau siab ntso siv zog ua los sis xav.
  • Nyuaj rau kev xav los sis kev muab siab rau ib yam twg, kuj hu tias yog "lub hlwb plooj"
  • Ua npaws
  • Ua pa nyuaj
  • Hnoos
  • Mob hauv siab
  • Lub plawv dhia nrawm (tsos mob ua rau lub plawv tshee)
  • Hloov pauv kev hnov ntxhiab thiab/los sis kev qab los noj mov
  • Mob tob hau
  • Teeb meem pw tsis tsaug zog
  • Nyuaj siab los sis ntxhov siab
  • Kiv taub hau thaum koj sawv
  • Mob pob qij txha los sis tej leeg nqaij
  • Hnov mob zoo li koob pos los sis koob chob
  • Mob plab
  • Raws plab
  • Tsam plab 
  • Ua pob khaus
  • Hloov pauv kev coj khaub ncaws

Leej twg thiaj li Muaj Tus Mob COVID Mus Ntev tau?

Tug neeg twg los xij uas tau muaj Tus Kab Mob COVID-19 tuj yeem Muaj Tus Mob COVID Mus Ntev, txawm yog tias lawv tsis muaj tsos mob thaum lawv tau muaj Tus Kab Mob COVID-19 los xij. Cov neeg uas kis tau Tus Kab Mob COVID-19 ntau tshaj ib zaug yuav muaj kev pheej hmoo Muaj Mob COVID Mus Ntev nrog kev kis mob txhua zaus tau.

Raws li kev tshawb fawb uas tau luam tawm thaum Lub Rau Hli 2024, kwv yees tias 6.4% ntawm cov neeg laus hauv Washington tau Tus Mob COVID Mus Ntev txij thaum Lub Kaum Hli 2023 los, uas kwv yees tias muaj 117,000 leej yuav tau txwv txhob ua tej dej num tseem ceeb. Qhov kev tshawb fawb no kuj pom tau tias cov lej ntawm Tus Mob COVID Mus Ntev tau nyob rau qhov siab tshaj plaws hauv Washington nruab nrab thiab sab hnub tuaj rau lub sij hawm no. Qhov feem pua ntawm Washington cov neeg laus muaj Tus Mob COVID Mus Ntev yeej tau txais kev kwv yees los ntawm Household Pulse Survey (Daim Ntawv Soj Ntsuam Txog Mem Tes Hauv Yim Neeg) yam tsis tu ncua.

Lub chaw CDC hais tias cov neeg uas yuav muaj feem muaj Tus Mob COVID Mus Ntev mas muaj xws li:

  • Cov poj niam.
  • Cov neeg laus uas muaj hnub nyoog lawm.
  • Cov neeg uas pheej muaj mob.
  • Cov neeg Hispanic thiab Latino.
  • Cov neeg uas muaj mob hnyav heev los sis mus pw hauv tsev kho mob uas muaj Tus Kab Mob COVID-19.
  • Cov neeg uas tsis tau mus txhaj tshuaj tiv thaiv Tus Kab Mob COVID-19.

Cov neeg uas ntsib kev nyuaj nrog cov kev tsis muaj vaj huam sib luag txog kev noj qab haus huv tuaj yeem muaj kev pheej hmoo txog cov kev cuam tshuam txog kev noj qab haus huv siab zog los ntawm Tus Mob COVID Mus Ntev. Kev tsis muaj vaj huam sib luag txog kev noj qab haus huv tshwm sim thaum ib pab pawg neeg muaj kev noj qab haus huv sib txawv vim yog txheej txheem ua(cuam tshuam rau tag nrho qhov txheej txheem), cov laj thawj uas zam tau thiab tsis muaj kev ncaj ncees.

Raws li Office of the Assistant Secretary of Health (OASH, Lub Chaw Hauj Lwm Ntawm Tus Neeg Pab Tus Thawj Tuav Tswj Ntaub Ntawv txog Kev Noj Qab Haus Huv), cov pawg neeg uas muaj kev nkag cuag tau rau kev kho mob tsawg dua los sis ntsib kev ntxub ntxaug (kev txaj muag los sis kev hnov txhaum) los ntawm lab npauv kev kho mob pheej yuav muaj kev nkag cuag tau rau kev kuaj Tus Mob COVID Mus Ntev tau tsawg zog.

Koj tuaj yeem nyeem kom paub ntau ntxiv hais txog qhov uas OASH tab tom hais txog kev tswj xyuas qhov muaj Tus Mob COVID Mus Ntev li cas nyob rau ntawm no.

Kev Tiv Thaiv Tus Mob COVID Mus Ntev

Koj tuaj yeem tiv thaiv tau Tus Mob COVID Mus Ntev kom txhob kis tau Tus Kab Mob COVID-19. Kev txhaj tshuaj tiv thaiv Tus Kab Mob COVID-19 kom tshiab tas li yog koj li kev tiv thaiv Tus Kab Mob COVID-19 tau zoo tshaj plaws.

Cov neeg uas txhaj tshuaj tiv thaiv kab mob lawm uas tseem mob COVID-19 tej zaum yuav muaj feem muaj Tus Mob COVID Mus Ntev tsawg dua li cov neeg uas tsis tau txhaj tshuaj tiv thaiv kab mob.

Lwm cov cuab yeej uas koj tuaj yeem siv los tiv thaiv kev kis tau Tus Kab Mob COVID-19 suav nrog kev looj daim ntaub npog qhov ncauj qhov ntswg, kev txhim kho ua kom cua lim tau zoo thiab muaj kev lim cua, ntxuav koj ob txhais tes nrog xab npum thiab dej tas li, ntxuav cov npoo uas muaj neeg tuav tas li, nyob kom sib nrug deb, thiab mus kuaj.

Yog tias koj muaj Tus Kab Mob COVID-19, tiv thaiv lwm tus kom txhob kis tau Tus Kab Mob COVID-19 uas yog ua raws li cov lus taw qhia no.

Tiv thaiv koj tus kheej kom txhob muaj Tus Mob COVID Mus Ntev: Mus Txhaj Tshuaj Tiv Thaiv Kab Mob (Lus Askiv) (PDF)

Kawm kom paub txog qhov txhaj tshuaj tiv thaiv kab mob COVID-19

Kev Kuaj Xyuas Tus Mob COVID Mus Ntev

Qhov ntawd yuav kuaj xyuas tau nyuaj txog Tus Mob COVID Mus Ntev. Nkag siab qee cov tsos mob tau nyuaj. Tam sim no tsis muaj cov kev kuaj nyob hauv chav kuaj mob los sis cov kev kawm tshawb fawb uas siv kev yees duab los ua kev kuaj xyuas Tus Mob COVID Mus Ntev. Cov kev kuaj fab chaw kuaj mob tsuas qhia tau cov tshwm sim tawm los zoo li qub xwb txawm tias tus neeg mob twb muaj TusMob COVID Mus Ntev lawm los xij. Kev Muaj Mob COVID Mus Ntev tuaj yeem qhia txog cov tsos mob los sis cov yam ntxwv nrog lwm cov zwj ceeb mob uas kho zoo tsis tu qab.

Qee cov neeg uas tshaj qhia txog cov tsos mob ntawm Tus Mob COVID Mus Ntev uas tsis pom tshwm muaj cov tsos mob ntawm Tus Kab Mob COVID-19 li. Lawv tsis tau mus kuaj txog Tus Kab Mob COVID-19 thaum lawv pib muaj mob thaum xub thawj. Qhov no ua rau nyuaj yuav qhia tau meej tias lawv tau muaj Tus Kab Mob COVID-19 thiab tuaj yeem ua rau kev kuaj mob muaj qhov nyuaj sib cov pes daws. Nws tuaj yeem pab tau zoo yog mus kuaj ntsuas Tus Kab Mob COVID-19 thaum pib hnov tias muaj mob thaum xub thawj los pab rau hauv koj li kev kuaj xyuas TusMob COVID Mus Ntev tom qab ntawd, yog tias tsim nyog.

Daim Ntawv Txheeb Qhia Txog Kev Teem Caij Mus Kho Mob rau Tus Mob COVID Mus Ntev (CDC) (Lus Askiv)

Cov Yam Ntxwv Fab Kev Noj Qab Haus Huv Tshiab thiab Twb Yeej Muaj Ua Ntej Los Lawm

Tus Mob COVID Mus Ntev tuaj yeem cuam tshuam tau rau ntau feem khoom hauv nruab nrog cev tau. Cov neeg mob tuaj yeem tshwm sim muaj nrog ib los sis ntau cov tsos mob uas tuaj yeem kuaj tau ntau ntxiv, xws li: cov mob uas mob los ntawm tus kheej thiab myalgic encephalomyelitis/chronic fatigue syndrome (ME/CFS).

Qhov no txhais tau tias cov neeg uas muaj mob COVID-19 tej zaum yuav muaj cov kev txhawj xeeb fab kev noj qab haus huv tshiab, xws li mob ntshav qab zib los sis mob plawv. Cov yam ntxwv fab kev noj qab haus huv uas twb yeej muaj lawm xws li kab mob tshav qab zib thiab kab mob plawv los kuj tuaj yeem dhau los ua mob loj tom qab muaj kev mob nkeeg los ntawm Tus Kab Mob COVID-19.

Kev Ua Neej nrog Tus Mob COVID Mus Ntev

Muaj ntau leej tseem tsis tau paub txog txoj hau kev kuaj xyuas thiab kho Tus Mob COVID Mus Ntev. Kev muaj Tus Mob COVID Mus Ntev los sis kev txhawb nqa ib tug neeg twg uas Muaj Tus Mob COVID Mus Ntev tuaj yeem hnov tau tias tsis paub meej li. Tus Mob COVID Mus Ntev tuaj yeem qhia pom txog cov tsos mob sib txawv ntawm ib tug neeg mus rau ib tug. Cov tsis mob yuav tswj tau rau qee leej tab sis ho lwm tus muaj kev xiam oob qhab tau.

Nco ntsoov tias koj tsis yog nyob ib leeg. Raws li Centers for Disease Control and Prevention (CDC), li ntawm 1 hauv 4 leej neeg laus uas muaj Tus Mob COVID Mus Ntev tshaj qhia tias nws ua rau lawv ua tsis tau lawv tej hauj lwm li niaj hnub ua. Kev mus koom nrog hauv pab pawg muab kev txhawb nqa tuaj yeem pab ua kom cov kev xav txog kev nyob ib leeg zoo tuaj.

Kawm kom paub ntxiv:

Thov txog kev pab cuam. Kev pab cuam yog kev hloov pauv uas tau ua rau ib tug neeg twg los sis qee yam. Cov tsos mob yuav ua rau cov tib neeg ua tej yam uas lawv muaj peev xwm ua tau yav ua ntej dhau los tau nyuaj los sis ua tsis tau li. Kev ua hauj lwm thiab cov hauj lwm nyob hauv tsev kawm ntawv tuaj yeem tswj tau nyuaj. Cov tswv hauj lwm thiab cov tsev kawm ntawv yuav muaj lub luag hauj lwm rau kev ua cov kev pab cuam yam tsim nyog rau koj cov tsos mob.

Saib 'Tus Mob COVID Mus Ntev thiab Cov Cai Ntawm Tus Neeg Xiam Oob Qhab' hauv qab no.

Kawm kom paub ntxiv:

Tswj hwm koj lub zog. Tus tsos mob uas keev pom yog kev hnov tias sab tas li, tshwj xeeb mas yog tom qab muaj kev xav los sis siv lub cev ntaj ntsug. Yuav tsum mob siab rau kev txuag koj lub zog thiab nquag so hauv ib hnub twg.

Kawm kom paub ntxiv txog 4 tug P ntawm kev tswj hwm koj lub zog rau Tus Mob COVID Mus Ntev rau ntawm no: 120-066 - Tus Mob-COVID Mus Ntev " Daim duab 4 P's" - 8.5x11 - Lub Rau Hli 2023 (wa.gov) (Lus Askiv)

Tus Mob COVID Mus Ntev thiab Cov Cai Kev Xiam Oob Qhab

Tus Mob COVID Mus Ntev tuaj yeem ua rau muaj kev tsis taus rau lub cev ntaj ntsug thiab kev xav. Nws tuaj yeem yog ib qhov kev xiam oob qhab nyob hauv Americans with Disabilities (ADA, Tsab Cai Hais Txog Neeg Meskas uas muaj Kev Xiam Oob Qhab). Cov neeg uas muaj Kev Muaj Mob COVID Mus Ntev tuaj yeem tau txais kev pov thaiv fab kev cai lij choj tsis pub raug kev ntxub ntxaug rau kev xiam oob qhab. Tej zaum lawv yuav muaj cai tau txais cov kev pab cuam yam muaj zoo laj thawj los ntawm cov chaw lag luam, lub xeev, thiab cov tsoom fwv hauv cheeb tsam zej zog.

Cov lus qhia txog “Tus Mob COVID Mus Ntev” tam li yog Tus Neeg Xiam Oob Qhab Raws Li Txoj Cai ADA (Lus Askiv)

Tus Mob COVID Mus Ntev thiab Kev Xeeb Me Nyuam

Cov neeg uas cev xeeb me nyuam los sis tsis ntev los no cev xeeb me nyuam muaj feem yuav dhau los ua mob loj los ntawm kab mob COVID-19. Kab mob COVID-19 tuaj yeem ua rau muaj mob uas muaj feem cuam tshuam rau cev xeeb me nyuam thiab tus me nyuam uas tab tom loj hlob. Yuav muaj kev nyab xeeb rau cov neeg uas cev xeeb me nyuam los sis pub mis rau me nyuam yog tias lawv raug txhaj tshuaj tiv thaiv Tus Kab Mob COVID-19.

Cov neeg cev xeeb me nyuam tuaj yeem huam ua tau Tus Mob COVID Mus Ntev tau. Tseem muaj kev kawm tshawb fawb txog kev cuam tshuam ntawm Tus Mob COVID Mus Ntev rau thaum sij hawm cev xeeb me nyuam thiab tom qab ntawd.

Tus Mob COVID Mus Ntev thiab Tub Ntxhais Hluas

Cov tub ntxhais hluas los kuj tuaj yeem muaj mob tau Tus Mob COVID Mus Ntev. Cov hluas uas keev sab nkees los sis muaj teeb meem txog kev tsi ntsees yuav nyuaj rau qhov mus tim tsev kawm ntawv thiab ua lwm cov dej num. Cov me nyuam yaus tseem yau yuav tsis muaj peev xwm piav qhia txog lawv cov tsos mob tau zoo.

Cov me nyuam yaus uas muaj Tus Mob COVID Mus Ntev tsim nyog rau qhov kev kawm tshwj xeeb, cov kev tiv thaiv los sis cov kev pab cuam uas muaj feem ntsig txog raws li Tsoom Fwv ob txoj cai.

Kev coj cov hluas mus txhaj tshuaj tiv thaiv Tus Kab Mob COVID-19 yog ib txoj hau kev zoo tshaj plaws yuav tiv thaiv tau Tus Mob COVID Mus Ntev rau cov hluas. Kawm kom paub ntxiv txog cov koob tshuaj tiv thaiv Tus Kab Mob COVID-19 nyob ntawm no.

Cov Chaw Muab Ntaub Ntawv Qhia Paub rau Zej Zog

Cov Chaw Muab Ntaub Ntawv Qhia Paub rau Cov Kws Kho Mob thiab Chaw Hauj Lwm Saib Xyuas Kev Noj Qab Haus Huv Rau Pej Xeem

Cov Chaw Muab Ntaub Ntawv Qhia Paub rau Cov Neeg Koom Tes