ਲੌਂਗ COVID ਕੀ ਹੈ?
ਜਦੋਂ ਕੋਈ ਵਿਅਕਤੀ COVID-19 ਦੇ ਨਾਲ ਬਿਮਾਰ ਹੁੰਦਾ ਹੈ ਤਾਂ ਉਸ ਤੋਂ ਬਾਅਦ ਉਸਨੂੰ ਲੌਂਗ COVID ਹੋ ਸਕਦਾ ਹੈ। ਇਹ ਇੱਕ ਚਿਰਕਾਲੀਨ ਬਿਮਾਰੀ ਹੈ, ਭਾਵ ਇਹ ਲੰਬੇ ਸਮੇਂ ਤੱਕ ਰਹਿੰਦੀ ਹੈ ਅਤੇ/ਜਾਂ ਸਮੇਂ ਦੇ ਨਾਲ ਆਉਂਦੀ ਅਤੇ ਜਾਂਦੀ ਹੈ। ਇਸਨੂੰ ਕਈ ਵਾਰ "ਪੋਸਟ-COVID ਸਿੰਡਰੋਮ", "ਪੋਸਟ-COVID-19 ਕੰਡੀਸ਼ਨਜ਼ (PCC)" ਜਾਂ "ਲੌਂਗ-ਹੌਲ COVID" ਵੀ ਕਿਹਾ ਜਾਂਦਾ ਹੈ।
ਲੌਂਗ COVID ਜਨਤਕ ਸਿਹਤ ਲਈ ਇੱਕ ਗੰਭੀਰ ਚਿੰਤਾ ਹੈ ਜਿਸਨੇ ਅਮਰੀਕਾ ਵਿੱਚ ਲੱਖਾਂ ਬਾਲਗਾਂ ਅਤੇ ਬੱਚਿਆਂ ਨੂੰ ਆਪਣੀ ਲਪੇਟ ਵਿੱਚ ਲਿਆ ਹੈ। ਇਸਦੇ ਲੱਛਣ ਹਲਕੇ ਤੋਂ ਗੰਭੀਰ ਤੱਕ ਹੋ ਸਕਦੇ ਹਨ ਅਤੇ ਘੱਟੋ-ਘੱਟ ਤਿੰਨ ਮਹੀਨਿਆਂ ਤੱਕ ਰਹਿ ਸਕਦੇ ਹਨ। ਕੁਝ ਮਾਮਲਿਆਂ ਵਿੱਚ, ਲੌਂਗ COVID ਦੇ ਕਾਰਨ ਅਪੰਗਤਾ ਵੀ ਹੋ ਸਕਦੀ ਹੈ।
ਲੌਂਗ COVID ਬਾਰੇ ਅਜੇ ਵੀ ਬਹੁਤ ਕੁਝ ਜਾਣਨਾ ਬਾਕੀ ਹੈ ਕਿਉਂਕਿ ਇਹ ਇੱਕ ਨਵੀਂ ਬਿਮਾਰੀ ਹੈ। COVID-19 ਦਾ ਕਾਰਨ ਬਣਨ ਵਾਲੇ SARS-CoV-2 ਵਾਇਰਸ ਦੀ ਖੋਜ ਪਹਿਲੀ ਵਾਰ 2019 ਵਿੱਚ ਹੋਈ ਸੀ। ਜਿਵੇਂ-ਜਿਵੇਂ ਇਸ ਉੱਤੇ ਸੋਧ ਹੁੰਦਾ ਰਹੇਗਾ, ਸਾਨੂੰ ਇਸ ਬਾਰੇ ਹੋਰ ਜਾਣਕਾਰੀ ਮਿਲਦੀ ਰਹੇਗੀ।
ਲੌਂਗ COVID ਦੇ ਲੱਛਣ
COVID-19 ਹੋਣ ਤੋਂ ਬਾਅਦ ਲੌਂਗ COVID ਦੇ ਲੱਛਣ ਕਈ ਮਹੀਨਿਆਂ ਜਾਂ ਸਾਲਾਂ ਤੱਕ ਮਹਿਸੂਸ ਹੋ ਸਕਦੇ ਹਨ। ਲੱਛਣ ਇੱਕ ਵਿਅਕਤੀ ਤੋਂ ਦੂਜੇ ਵਿਅਕਤੀ ਵਿੱਚ ਵੱਖ-ਵੱਖ ਹੋ ਸਕਦੇ ਹਨ ਅਤੇ ਇਹਨਾਂ ਦੀ ਪਛਾਣ ਜਾਂ ਨਿਦਾਨ ਕਰਨਾ ਮੁਸ਼ਕਲ ਹੋ ਸਕਦਾ ਹੈ।
Centers for Disease Control and Prevention (CDC, ਰੋਗ ਨਿਯੰਤਰਣ ਅਤੇ ਰੋਕਥਾਮ ਕੇਂਦਰ) ਦੇ ਅਨੁਸਾਰ, ਲੌਂਗ COVID ਦੇ 200 ਤੋਂ ਵੱਧ ਲੱਛਣ ਹਨ। ਸਰੀਰਕ ਜਾਂ ਮਾਨਸਿਕ ਮਿਹਨਤ ਕਰਨ ਤੋਂ ਬਾਅਦ ਲੱਛਣ ਹੋਰ ਵੀ ਵਿਗੜ ਸਕਦੇ ਹਨ। ਸਭ ਤੋਂ ਆਮ ਲੱਛਣ ਇਹ ਹਨ:
- ਥਕਾਵਟ, ਜਿਸ ਕਾਰਨ ਰੋਜ਼ਾਨਾ ਜੀਵਨ ਦੇ ਕੰਮਾਂ ਵਿੱਚ ਰੁਕਾਵਟ ਆਉਂਦੀ ਹੈ
- ਸਰੀਰਕ ਜਾਂ ਮਾਨਸਿਕ ਮਿਹਨਤ ਕਰਨ ਤੋਂ ਬਾਅਦ ਆਮ ਤੌਰ 'ਤੇ ਬਿਮਾਰ ਮਹਿਸੂਸ ਹੋਣਾ (ਜਿਸ ਬਾਰੇ ਸਮਝਾਉਣਾ ਵੀ ਔਖਾ ਹੋ ਸਕਦਾ ਹੈ)
- ਸੋਚਣ ਅਤੇ ਧਿਆਨ ਕੇਂਦਰਿਤ ਕਰਨ ਵਿੱਚ ਮੁਸ਼ਕਲ, ਜਿਸਨੂੰ "ਦਿਮਾਗੀ ਉਲਝਣ" ਵੀ ਕਿਹਾ ਜਾਂਦਾ ਹੈ।
- ਬੁਖਾਰ
- ਸਾਹ ਲੈਣ ਵਿੱਚ ਤਕਲੀਫ਼
- ਖੰਘ
- ਛਾਤੀ ਵਿੱਚ ਦਰਦ
- ਦਿਲ ਦੀ ਧੜਕਣ ਦਾ ਤੇਜ਼ ਹੋਣਾ (ਦਿਲ ਦੀ ਧੜਕਣ ਦਾ ਵਧਣਾ)
- ਗੰਧ ਅਤੇ/ਜਾਂ ਸੁਆਦ ਵਿੱਚ ਤਬਦੀਲੀ
- ਸਿਰ ਦਰਦ
- ਨੀਂਦ ਦੀ ਸਮੱਸਿਆ
- ਚਿੰਤਾ ਜਾਂ ਉਦਾਸੀਨਤਾ
- ਖੜ੍ਹੇ ਹੋਣ 'ਤੇ ਚੱਕਰ ਆਉਣਾ
- ਜੋੜਾਂ ਜਾਂ ਮਾਸਪੇਸ਼ੀਆਂ ਵਿੱਚ ਦਰਦ
- ਪਿੰਨਾਂ ਅਤੇ ਸੂਈਆਂ ਚੁੱਭਣ ਦਾ ਅਹਿਸਾਸ ਹੋਣਾ
- ਪੇਟ ਦਰਦ
- ਦਸਤ
- ਕਬਜ਼
- ਧੱਫੜ
- ਮਾਹਵਾਰੀ ਚੱਕਰ ਵਿੱਚ ਤਬਦੀਲੀਆਂ
ਲੌਂਗ COVID ਕਿਸ ਨੂੰ ਹੋ ਸਕਦਾ ਹੈ?
ਜਿਸ ਨੂੰ ਵੀ COVID-19 ਹੋਇਆ ਸੀ ਉਹਨਾਂ ਨੂੰ ਲੌਂਗ COVID ਹੋ ਸਕਦਾ ਹੈ, ਭਾਵੇਂ ਉਹਨਾਂ ਨੂੰ COVID-19 ਹੋਣ ਵੇਲੇ ਕੋਈ ਲੱਛਣ ਨਾ ਵੀ ਹੋਣ। ਜਿਹੜੇ ਲੋਕ ਇੱਕ ਤੋਂ ਜ਼ਿਆਦਾ ਵਾਰ COVID-19 ਦੇ ਸ਼ਿਕਾਰ ਬਣਦੇ ਹਨ, ਉਹਨਾਂ ਨੂੰ ਹਰ ਵਾਰ ਸੰਕਰਮਣ ਤੋਂ ਬਾਅਦ ਲੌਂਗ COVID ਹੋਣ ਦਾ ਖਤਰਾ ਹੁੰਦਾ ਹੈ।
ਜੂਨ 2024 ਵਿੱਚ ਪ੍ਰਕਾਸ਼ਿਤ ਹੋਏ ਸੋਧ ਦੇ ਅਨੁਸਾਰ, ਇਹ ਅਨੁਮਾਨ ਲਗਾਇਆ ਗਿਆ ਹੈ ਕਿ ਅਕਤੂਬਰ 2023 ਤੱਕ ਵਾਸ਼ਿੰਗਟਨ ਵਿੱਚ 6.4% ਬਾਲਗ, ਲੌਂਗ COVID ਦਾ ਸ਼ਿਕਾਰ ਬਣੇ ਸਨ, ਜਿਹਨਾਂ ਵਿੱਚੋਂ ਲਗਭਗ 117,000 ਬਾਲਗਾਂ ਦੀਆਂ ਆਪਣੀਆਂ ਰੋਜ਼ਾਨਾਂ ਦੀਆਂ ਗਤੀਵਿਧੀਆਂ ਸੀਮਿਤ ਹੋ ਗਈਆਂ ਸਨ। ਇਸ ਸੋਧ ਵਿੱਚ ਇਹ ਵੀ ਪਤਾ ਲੱਗਿਆ ਹੈ ਕਿ ਇਸ ਸਮੇਂ ਲੌਂਗ COVID ਦੇ ਮਾਮਲੇ ਮੱਧ ਅਤੇ ਪੂਰਬੀ ਵਾਸ਼ਿੰਗਟਨ ਵਿੱਚ ਸਭ ਤੋਂ ਵੱਧ ਸਨ। ਵਾਸ਼ਿੰਗਟਨ ਵਿੱਚ ਲੌਂਗ COVID ਨਾਲ ਪੀੜਤ ਬਾਲਗਾਂ ਦੇ ਪ੍ਰਤੀਸ਼ਤ ਦਾ ਅਨੁਮਾਨ ਨਿਯਮਿਤ ਤੌਰ 'ਤੇ Household Pulse Survey (ਹਾਊਸਹੋਲਡ ਪਲਸ ਸਰਵੇਖਣ) ਦੁਆਰਾ ਲਗਾਇਆ ਜਾਂਦਾ ਹੈ।
CDC ਦਾ ਕਹਿਣਾ ਹੈ ਕਿ ਜਿਹਨਾਂ ਲੋਕਾਂ ਨੂੰ ਲੌਂਗ COVID ਹੋਣ ਦੀ ਸੰਭਾਵਨਾ ਜ਼ਿਆਦਾ ਹੁੰਦੀ ਹੈ, ਉਹਨਾਂ ਵਿੱਚ ਇਹ ਸ਼ਾਮਲ ਹਨ:
- ਔਰਤਾਂ।
- ਬਜ਼ੁਰਗ।
- ਉਹ ਲੋਕ ਜਿਹਨਾਂ ਨੂੰ ਦਿਲ ਦੇ ਰੋਗ ਦੀ ਪੁਰਾਣੀ ਸ਼ਿਕਾਇਤ ਹੈ।
- ਹਿਸਪੈਨਿਕ ਅਤੇ ਲੈਟਿਨੋ ਭਾਈਚਾਰੇ ਦੇ ਲੋਕ।
- ਉਹ ਲੋਕ ਜੋ COVID-19 ਕਾਰਨ ਬਹੁਤ ਬਿਮਾਰ ਹੋਏ ਸਨ ਜਾਂ ਹਸਪਤਾਲ ਵਿੱਚ ਭਰਤੀ ਹੋਏ ਸਨ।
- ਉਹ ਲੋਕ ਜਿਹਨਾਂ ਨੇ COVID-19 ਤੋਂ ਬਚਣ ਲਈ ਵੈਕਸੀਨ ਨਹੀਂ ਲਗਵਾਈ।
ਜਿਹੜੇ ਲੋਕ ਸਿਹਤ ਸੰਬੰਧੀ ਅਸਮਾਨਤਾਵਾਂ ਨਾਲ ਪੀੜਤ ਹਨ, ਉਹਨਾਂ ਦੀ ਸਿਹਤ ‘ਤੇ ਲੌਂਗ COVID ਕਾਰਨ ਨਕਾਰਾਤਮਕ ਅਸਰ ਹੋਣ ਦਾ ਖ਼ਤਰਾ ਜ਼ਿਆਦਾ ਹੋ ਸਕਦਾ ਹੈ। ਸਿਹਤ ਸੰਬੰਧੀ ਅਸਮਾਨਤਾਵਾਂ ਉਦੋਂ ਵਾਪਰਦੀਆਂ ਹਨ ਜਦੋਂ ਲੋਕਾਂ ਦੇ ਇੱਕ ਸਮੂਹ ਨੂੰ ਪ੍ਰਣਾਲੀਗਤ (ਜਿਸ ਨਾਲ ਪੂਰਾ ਸਿਸਟਮ ਪ੍ਰਭਾਵਿਤ ਹੁੰਦਾ ਹੈ), ਟਾਲਣ ਯੋਗ ਅਤੇ ਅਣਉਚਿਤ ਕਾਰਨਾਂ ਕਰਕੇ, ਸਿਹਤ ਸੇਵਾਵਾਂ ਠੀਕ ਢੰਗ ਨਾਲ ਨਹੀਂ ਮਿਲਦੀਆਂ ਹਨ।
Office of the Assistant Secretary of Health (OASH, ਸਿਹਤ ਵਿਭਾਗ ਦੇ ਸਹਾਇਕ ਸਕੱਤਰ ਦੇ ਦਫ਼ਤਰ) ਅਨੁਸਾਰ, ਜਿਹਨਾਂ ਸਮੂਹਾਂ ਨੂੰ ਸਿਹਤ ਸੇਵਾਵਾਂ ਤੱਕ ਘੱਟ ਪਹੁੰਚ ਮਿਲਦੀ ਹੈ ਜਾਂ ਜੋ ਸਿਹਤ ਸੰਭਾਲ ਸਿਸਟਮ ਤੋਂ ਬਦਨਾਮੀ (ਸ਼ਰਮ ਜਾਂ ਦੋਸ਼) ਦਾ ਅਨੁਭਵ ਕਰਦੇ ਹਨ, ਉਹਨਾਂ ਵਿੱਚ ਲੌਂਗ COVID ਦਾ ਨਿਦਾਨ ਹੋਣ ਦੀ ਸੰਭਾਵਨਾ ਘੱਟ ਹੋ ਸਕਦੀ ਹੈ।
ਤੁਸੀਂ ਇੱਥੇ ਪੜ੍ਹ ਸਕਦੇ ਹੋ ਕਿ OASH ਲੌਂਗ COVID ਸੰਬੰਧੀ ਅਸਮਾਨਤਾਵਾਂ ਨੂੰ ਕਿਵੇਂ ਹੱਲ ਕਰ ਰਿਹਾ ਹੈ।
ਲੌਂਗ COVID ਤੋਂ ਰੋਕਥਾਮ
ਤੁਸੀਂ COVID-19 ਤੋਂ ਬਚ ਕੇ ਲੌਂਗ COVID ਤੋਂ ਵੀ ਬਚ ਸਕਦੇ ਹੋ। COVID-19 ਵੈਕਸੀਨੇਸ਼ਨ ਨਾਲ ਅੱਪ-ਟੂ-ਡੇਟ ਰਹਿਣਾ, COVID-19 ਤੋਂ ਬਚਣ ਦਾ ਸਭ ਤੋਂ ਵਧੀਆ ਤਰੀਕਾ ਹੈ।
ਵੈਕਸੀਨ ਲਗਵਾਉਣ ਦੇ ਬਾਵਜੂਦ ਜਿਹਨਾਂ ਲੋਕਾਂ ਨੂੰ COVID-19 ਹੁੰਦਾ ਹੈ, ਉਹਨਾਂ ਨੂੰ ਵੈਕਸੀਨ ਨਾ ਲਗਵਾਉਣ ਵਾਲੇ ਲੋਕਾਂ ਦੇ ਮੁਕਾਬਲੇ ਲੌਂਗ COVID ਹੋਣ ਦੀ ਸੰਭਾਵਨਾ ਘੱਟ ਹੁੰਦੀ ਹੈ।
COVID-19 ਦੇ ਸੰਕਰਮਣ ਤੋਂ ਬਚਣ ਲਈ ਤੁਸੀਂ ਜਿਹੜੇ ਹੋਰ ਤਰੀਕੇ ਵਰਤ ਸਕਦੇ ਹੋ ਉਹਨਾਂ ਵਿੱਚ ਮਾਸਕ ਪਹਿਨਣਾ, ਹਵਾ ਦੇ ਪ੍ਰਵਾਹ ਅਤੇ ਫਿਲਟਰੇਸ਼ਨ ਨੂੰ ਸੁਧਾਰਨਾ, ਸਾਬਣ ਅਤੇ ਪਾਣੀ ਨਾਲ ਆਪਣੇ ਹੱਥਾਂ ਨੂੰ ਵਾਰ-ਵਾਰ ਧੋਣਾ, ਅਕਸਰ ਛੂਹੀਆਂ ਜਾਣ ਵਾਲੀਆਂ ਸਤਾਹਾਂ ਨੂੰ ਸਾਫ਼ ਕਰਨਾ, ਸਰੀਰਕ ਦੂਰੀ ਬਣਾ ਕੇ ਰੱਖਣਾ ਅਤੇ ਟੈਸਟ ਕਰਵਾਉਣਾ ਸ਼ਾਮਲ ਹੈ।
ਜੇਕਰ ਤੁਹਾਨੂੰ COVID-19 ਹੈ, ਤਾਂ ਇਹਨਾਂ ਹਿਦਾਇਤਾਂ ਦੀ ਪਾਲਣਾ ਕਰਕੇ ਦੂਜਿਆਂ ਨੂੰ COVID-19 ਹੋਣ ਤੋਂ ਬਚਾਓ।
ਖੁਦ ਨੂੰ ਲੌਂਗ COVID ਤੋਂ ਬਚਾਓ: ਵੈਕਸੀਨ ਲਗਵਾਓ (ਅੰਗਰੇਜ਼ੀ) (PDF)
COVID-19 ਦੀ ਵੈਕਸੀਨ ਪ੍ਰਾਪਤ ਕਰਨ ਬਾਰੇ ਜਾਣੋ
ਲੌਂਗ COVID ਦਾ ਨਿਦਾਨ ਕਰਨਾ
ਲੌਂਗ COVID ਦਾ ਨਿਦਾਨ ਕਰਨਾ ਮੁਸ਼ਕਲ ਹੋ ਸਕਦਾ ਹੈ। ਕੁਝ ਲੱਛਣਾਂ ਨੂੰ ਸਮਝਣਾ ਮੁਸ਼ਕਲ ਹੋ ਸਕਦਾ ਹੈ। ਲੌਂਗ COVID ਦਾ ਨਿਦਾਨ ਕਰਨ ਲਈ ਫ਼ਿਲਹਾਲ ਕੋਈ ਲੈਬ ਟੈਸਟ ਜਾਂ ਇਮੇਜਿੰਗ ਅਧਿਐਨ ਉਪਲਬਧ ਨਹੀਂ ਹਨ। ਭਾਵੇਂ ਕਿਸੇ ਮਰੀਜ਼ ਨੂੰ ਲੌਂਗ COVID ਹੈ, ਪਰ ਮੈਡੀਕਲ ਟੈਸਟ ਉਸ ਦਾ ਪਤਾ ਲਗਾਉਣ ਵਿੱਚ ਅਸਫਲ ਹੋ ਸਕਦੇ ਹਨ। ਲੌਂਗ COVID ਦੇ ਲੱਛਣ ਜਾਂ ਵਿਸ਼ੇਸ਼ਤਾਵਾਂ, ਲੰਬੇ ਸਮੇਂ ਤੋਂ ਚੱਲ ਰਹੀਆਂ ਬਿਮਾਰੀਆਂ ਨਾਲ ਮਿਲਦੀਆਂ-ਜੁਲਦੀਆਂ ਹੋ ਸਕਦੀਆਂ ਹਨ।
ਕੁਝ ਲੋਕ ਜਿਹਨਾਂ ਨੇ ਲੌਂਗ COVID ਦੇ ਲੱਛਣਾਂ ਦੀ ਸ਼ਿਕਾਇਤ ਕੀਤੀ ਸੀ, ਉਹਨਾਂ ਵਿੱਚ COVID-19 ਦੇ ਲੱਛਣ ਦੇਖਣ ਨੂੰ ਨਹੀਂ ਮਿਲੇ ਸਨ। ਜਦੋਂ ਉਹ ਪਹਿਲੀ ਵਾਰ ਬਿਮਾਰ ਹੋਏ ਸਨ ਤਾਂ ਉਹਨਾਂ ਦਾ COVID-19 ਲਈ ਟੈਸਟ ਨਹੀਂ ਹੋਇਆ ਸੀ। ਇਸ ਨਾਲ ਇਹ ਪੁਸ਼ਟੀ ਕਰਨਾ ਔਖਾ ਹੋ ਜਾਂਦਾ ਹੈ ਕਿ ਕੀ ਉਹਨਾਂ ਨੂੰ COVID-19 ਹੋਇਆ ਸੀ ਅਤੇ ਇਹ ਉਸ ਦਾ ਨਿਦਾਨ ਕਰਨਾ ਵੀ ਗੁੰਝਲਦਾਰ ਬਣਾ ਸਕਦਾ ਹੈ। ਜਦੋਂ ਤੁਸੀਂ ਪਹਿਲੀ ਵਾਰ ਬਿਮਾਰ ਹੁੰਦੇ ਹੋ ਤਾਂ COVID-19 ਲਈ ਟੈਸਟ ਕਰਵਾਉਣਾ ਮਦਦਗਾਰ ਹੋ ਸਕਦਾ ਹੈ ਤਾਂ ਜੋ ਲੋੜ ਪੈਣ 'ਤੇ ਬਾਅਦ ਵਿੱਚ ਆਪਣੇ ਲੌਂਗ COVID ਦਾ ਨਿਦਾਨ ਕਰਨ ਵਿੱਚ ਮਦਦ ਮਿਲ ਸਕੇ।
ਲੌਂਗ COVID ਲਈ ਹੈਲਥਕੇਅਰ ਅਪਾਇੰਟਮੈਂਟ ਚੈੱਕਲਿਸਟ (CDC) (ਅੰਗਰੇਜ਼ੀ)
ਨਵੀਆਂ ਅਤੇ ਪਹਿਲਾਂ ਤੋਂ ਮੌਜੂਦ ਸਿਹਤ ਸਮੱਸਿਆਵਾਂ
ਲੌਂਗ COVID ਕਈ ਅੰਗ ਪ੍ਰਣਾਲੀਆਂ ਨੂੰ ਪ੍ਰਭਾਵਿਤ ਕਰ ਸਕਦਾ ਹੈ। ਮਰੀਜ਼ਾਂ ਵਿੱਚ ਇੱਕ ਜਾਂ ਇੱਕ ਤੋਂ ਵੱਧ ਨਿਦਾਨਯੋਗ ਸਥਿਤੀਆਂ ਮੌਜੂਦ ਹੋ ਸਕਦੀਆਂ ਹਨ, ਜਿਵੇਂ ਕਿ: ਆਟੋਇਮਿਊਨ ਸਥਿਤੀਆਂ ਅਤੇ ਮਾਇਲਜਿਕ ਐਨਸੇਫੈਲੋਮਾਈਲਾਈਟਿਸ/ਕ੍ਰੋਨਿਕ ਫਟੀਗ ਸਿੰਡਰੋਮ (ME/CFS) (ਅੰਗਰੇਜ਼ੀ)।
ਇਸਦਾ ਮਤਲਬ ਇਹ ਹੈ ਕਿ ਜਿਹਨਾਂ ਲੋਕਾਂ ਨੂੰ COVID-19 ਹੋਇਆ ਸੀ, ਉਹਨਾਂ ਦੀ ਸਿਹਤ ਲਈ ਨਵੀਆਂ ਸਮੱਸਿਆਵਾਂ ਪੈਦਾ ਹੋ ਸਕਦੀਆਂ ਹਨ, ਜਿਵੇਂ ਕਿ ਡਾਇਬਿਟੀਜ਼ ਜਾਂ ਦਿਲ ਦੀਆਂ ਬਿਮਾਰੀਆਂ। ਪਹਿਲਾਂ ਤੋਂ ਮੌਜੂਦ ਬਿਮਾਰੀਆਂ ਜਿਵੇਂ ਕਿ ਡਾਇਬਿਟੀਜ਼ ਅਤੇ ਦਿਲ ਦੀ ਬਿਮਾਰੀ, COVID-19 ਦੀ ਬਿਮਾਰੀ ਤੋਂ ਬਾਅਦ ਹੋਰ ਵੀ ਬਦਤਰ ਹੋ ਸਕਦੀਆਂ ਹਨ।
ਲੌਂਗ COVID ਦੇ ਨਾਲ ਜੀਵਨ ਬਿਤਾਉਣਾ
ਲੌਂਗ COVID ਦਾ ਨਿਦਾਨ ਅਤੇ ਇਲਾਜ ਕਿਵੇਂ ਕਰਨਾ ਹੈ, ਇਸ ਬਾਰੇ ਅਜੇ ਵੀ ਬਹੁਤ ਘੱਟ ਜਾਣਕਾਰੀ ਉਪਲਬਧ ਹੈ। ਲੌਂਗ COVID ਦਾ ਸ਼ਿਕਾਰ ਹੋਣਾ ਜਾਂ ਲੌਂਗ COVID ਨਾਲ ਪੀੜਤ ਵਿਅਕਤੀ ਦੀ ਸਹਾਇਤਾ ਕਰਨਾ ਉਲਝਣ ਭਰਿਆ ਹੋ ਸਕਦਾ ਹੈ। ਲੌਂਗ COVID ਦੇ ਲੱਛਣ ਵਿਅਕਤੀ ਤੋਂ ਵਿਅਕਤੀ ਵੱਖ-ਵੱਖ ਹੋ ਸਕਦੇ ਹਨ। ਕੁਝ ਲੋਕਾਂ ਵਿੱਚ ਲੱਛਣਾਂ ਨੂੰ ਕਾਬੂ ਕੀਤਾ ਜਾ ਸਕਦਾ ਹੈ ਅਤੇ ਕੁਝ ਲੋਕਾਂ ਵਿੱਚ ਇਹ ਲੱਛਣ ਅਪੰਗਤਾ ਦਾ ਕਾਰਨ ਵੀ ਬਣ ਸਕਦੇ ਹਨ।
ਯਾਦ ਰੱਖੋ ਕਿ ਤੁਸੀਂ ਇਕੱਲੇ ਨਹੀਂ ਹੋ। Centers for Disease Control and Prevention (CDC) ਦੇ ਅਨੁਸਾਰ, ਲੌਂਗ COVID ਨਾਲ ਪੀੜਤ 4 ਵਿੱਚੋਂ 1 ਬਾਲਗ ਨੇ ਦੱਸਿਆ ਹੈ ਕਿ ਇਸ ਕਾਰਨ ਉਹਨਾਂ ਦੀਆਂ ਰੋਜ਼ਾਨਾ ਦੀਆਂ ਗਤੀਵਿਧੀਆਂ ਸੀਮਿਤ ਹੋ ਗਈਆਂ ਹਨ। ਕਿਸੇ ਸਹਾਇਤਾ ਸਮੂਹ ਵਿੱਚ ਸ਼ਾਮਲ ਹੋਣ ਨਾਲ ਇਕੱਲਤਾ ਦੀਆਂ ਭਾਵਨਾਵਾਂ ਨੂੰ ਦੂਰ ਕਰਨ ਵਿੱਚ ਮਦਦ ਮਿਲ ਸਕਦੀ ਹੈ।
ਲੌਂਗ COVID ਅਤੇ ਗਰਭ-ਅਵਸਥਾ
ਗਰਭਵਤੀ ਅਤੇ ਹਾਲ ਹੀ ਵਿੱਚ ਗਰਭਵਤੀ ਹੋਈਆਂ ਔਰਤਾਂ ਦੀ COVID-19 ਨਾਲ ਗੰਭੀਰ ਰੂਪ ਵਿੱਚ ਬਿਮਾਰ ਹੋਣ ਦੀ ਸੰਭਾਵਨਾ ਜ਼ਿਆਦਾ ਹੁੰਦੀ ਹੈ। COVID-19 ਅਜਿਹੀਆਂ ਮੁਸ਼ਕਲਾਂ ਦਾ ਕਾਰਨ ਬਣ ਸਕਦਾ ਹੈ ਜੋ ਗਰਭ-ਅਵਸਥਾ ਅਤੇ ਵਿਕਸਿਤ ਹੋ ਰਹੇ ਬੱਚੇ ਨੂੰ ਪ੍ਰਭਾਵਿਤ ਕਰਦੀਆਂ ਹਨ।
ਇਸ ਬਾਰੇ ਅਜੇ ਵੀ ਬਹੁਤ ਘੱਟ ਜਾਣਕਾਰੀ ਉਪਲਬਧ ਹੈ ਕਿ COVID ਗਰਭ-ਅਵਸਥਾ ਨੂੰ ਕਿੰਨੇ ਸਮੇਂ ਤੱਕ ਪ੍ਰਭਾਵਿਤ ਕਰ ਸਕਦਾ ਹੈ। National Institutes of Health (NIH, ਰਾਸ਼ਟਰੀ ਸਿਹਤ ਸੰਸਥਾਨ) (ਅੰਗਰੇਜ਼ੀ ਵਿੱਚ) ਉਹਨਾਂ ਔਰਤਾਂ ਅਤੇ ਉਹਨਾਂ ਦੀ ਸੰਤਾਨ ਵਿੱਚ COVID-19 ਦੇ ਲੰਬੇ ਸਮੇਂ ਤੱਕ ਚੱਲਣ ਦੇ ਪ੍ਰਭਾਵਾਂ ਬਾਰੇ 4-ਸਾਲ ਦਾ ਅਧਿਐਨ ਕਰੇਗਾ ਜਿਹਨਾਂ ਨੂੰ ਗਰਭਵਤੀ ਹੋਣ ਦੌਰਾਨ COVID-19 ਹੋਇਆ ਸੀ।
ਹੋਰ ਜਾਣੋ:
- ਲੌਂਗ COVID ਬਾਰੇ ਹੋਰ ਕਹਾਣੀਆਂ ਪੜ੍ਹੋ (storycorps.org) (ਅੰਗਰੇਜ਼ੀ)
- LongCOVIDFamilies.org (ਅੰਗਰੇਜ਼ੀ)
ਅਕੋਮੋਡੇਸ਼ਨ ਦੀ ਮੰਗ ਕਰੋ। ਅਕੋਮੋਡੇਸ਼ਨ ਕਿਸੇ ਵਿਅਕਤੀ ਜਾਂ ਕਿਸੇ ਚੀਜ਼ ਲਈ ਕੀਤੀ ਗਈ ਤਬਦੀਲੀ ਨੂੰ ਕਹਿੰਦੇ ਹਨ। ਬਿਮਾਰੀ ਦੇ ਲੱਛਣ ਲੋਕਾਂ ਲਈ ਉਹ ਕੰਮ ਕਰਨਾ ਮੁਸ਼ਕਲ ਜਾਂ ਅਸੰਭਵ ਬਣਾ ਸਕਦੇ ਹਨ ਜੋ ਉਹ ਬਿਮਾਰ ਹੋਣ ਤੋਂ ਪਹਿਲਾਂ ਕਰ ਸਕਦੇ ਸਨ। ਦਫ਼ਤਰ ਅਤੇ ਸਕੂਲ ਦੇ ਕੰਮਾਂ ਨੂੰ ਕਰਨਾ ਮੁਸ਼ਕਲ ਹੋ ਸਕਦਾ ਹੈ। ਤੁਹਾਡੇ ਲੱਛਣਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਢੁਕਵੇਂ ਇੰਤਜ਼ਾਮ ਕਰਨ ਦੀ ਜ਼ਿੰਮੇਵਾਰੀ ਰੁਜ਼ਗਾਰਦਾਤਾ ਅਤੇ ਸਕੂਲ ਦੀ ਹੋ ਸਕਦੀ ਹੈ।
ਹੇਠਾਂ ‘ਲੌਂਗ COVID ਅਤੇ ਅਪੰਗਤਾ ਸੰਬੰਧੀ ਅਧਿਕਾਰ’ ਪੜ੍ਹੋ।
ਹੋਰ ਜਾਣੋ:
- ਕਮਿਊਨਿਟੀ ਲਿਵਿੰਗ ਲਈ ਐਡਮਨਿਸਟ੍ਰੇਸ਼ਨ ਤੋਂ ਸਰੋਤਾਂ ਦੀ ਸੂਚੀ (ਅੰਗਰੇਜ਼ੀ)
- ਸਕੂਲ ਵਿੱਚ ਇੰਤਜ਼ਾਮ (ਲੌਂਗ COVID ਫੈਮਿਲੀਜ਼) (ਅੰਗਰੇਜ਼ੀ)
ਆਪਣੀ ਊਰਜਾ ਦਾ ਪ੍ਰਬੰਧ ਕਰੋ। ਅਕਸਰ ਥਕਾਵਟ ਮਹਿਸੂਸ ਹੋਣਾ ਇੱਕ ਆਮ ਲੱਛਣ ਹੈ, ਖਾਸ ਕਰਕੇ ਮਾਨਸਿਕ ਜਾਂ ਸਰੀਰਕ ਮਿਹਨਤ ਤੋਂ ਬਾਅਦ। ਆਪਣੀ ਊਰਜਾ ਬਚਾਓ ਅਤੇ ਪੂਰੇ ਦਿਨ ਵਿੱਚ ਬਾਰ-ਬਾਰ ਆਰਾਮ ਕਰਨਾ ਨਾ ਭੁੱਲੋ।
ਲੌਂਗ COVID ਹੋਣ 'ਤੇ ਆਪਣੀ ਊਰਜਾ ਦਾ ਪ੍ਰਬੰਧ ਕਰਨ ਲਈ 4 P ਬਾਰੇ ਇੱਥੇ ਹੋਰ ਜਾਣੋ: 120-066 - ਲੌਂਗ-COVID "4 P" ਪੋਸਟਰ - 8.5x11 - ਜੂਨ 2023 (wa.gov) (ਅੰਗਰੇਜ਼ੀ)
ਲੌਂਗ COVID ਅਤੇ ਅਪੰਗਤਾ ਸੰਬੰਧੀ ਅਧਿਕਾਰ
ਲੌਂਗ COVID ਦੇ ਕਾਰਨ ਸਰੀਰਕ ਅਤੇ ਮਾਨਸਿਕ ਅਪੰਗਤਾ ਪੈਦਾ ਹੋ ਸਕਦੀ ਹੈ। ਇਸਨੂੰ Americans with Disabilities Act (ADA, ਅਮਰੀਕੀ ਅਪੰਗਤਾ ਐਕਟ) ਦੇ ਤਹਿਤ ਅਪੰਗਤਾ ਮੰਨਿਆ ਜਾ ਸਕਦਾ ਹੈ। ਲੌਂਗ COVID ਨਾਲ ਪੀੜਤ ਲੋਕ ਕਾਨੂੰਨੀ ਤੌਰ 'ਤੇ ਅਪੰਗਤਾ ਸੰਬੰਧੀ ਭੇਦਭਾਵ ਤੋਂ ਸੁਰੱਖਿਆ ਪ੍ਰਾਪਤ ਕਰ ਸਕਦੇ ਹਨ। ਉਹ ਕਾਰੋਬਾਰਾਂ, ਰਾਜ ਅਤੇ ਸਥਾਨਕ ਸਰਕਾਰਾਂ ਤੋਂ ਵਾਜਬ ਅਕੋਮੋਡੇਸ਼ਨ ਦੇ ਲਈ ਵੀ ਹੱਕਦਾਰ ਹੋ ਸਕਦੇ ਹਨ।
ADA ਦੇ ਅਧੀਨ ਇੱਕ ਅਪੰਗਤਾ ਦੇ ਤੌਰ 'ਤੇ “ਲੌਂਗ COVID” ਬਾਰੇ ਹਿਦਾਇਤਾਂ (ਅੰਗਰੇਜ਼ੀ)
ਲੌਂਗ COVID ਅਤੇ ਗਰਭ-ਅਵਸਥਾ
ਗਰਭਵਤੀ ਅਤੇ ਹਾਲ ਹੀ ਵਿੱਚ ਗਰਭਵਤੀ ਹੋਈਆਂ ਔਰਤਾਂ ਦੀ COVID-19 ਨਾਲ ਗੰਭੀਰ ਰੂਪ ਵਿੱਚ ਬਿਮਾਰ ਹੋਣ ਦੀ ਸੰਭਾਵਨਾ ਜ਼ਿਆਦਾ ਹੁੰਦੀ ਹੈ। COVID-19 ਅਜਿਹੀਆਂ ਮੁਸ਼ਕਲਾਂ ਦਾ ਕਾਰਨ ਬਣ ਸਕਦਾ ਹੈ ਜੋ ਗਰਭ-ਅਵਸਥਾ ਅਤੇ ਵਿਕਸਿਤ ਹੋ ਰਹੇ
ਬੱਚੇ ਨੂੰ ਪ੍ਰਭਾਵਿਤ ਕਰਦੀਆਂ ਹਨ। ਗਰਭਵਤੀ ਜਾਂ ਦੁੱਧ ਚੁੰਘਾਉਣ ਵਾਲੀਆਂ ਔਰਤਾਂ ਲਈ COVID-19 ਤੋਂ ਬਚਣ ਲਈ ਵੈਕਸੀਨ ਪ੍ਰਾਪਤ ਕਰਨਾ ਸੁਰੱਖਿਅਤ ਹੈ ਅਤੇ ਇਸਦੀ ਸਿਫਾਰਸ਼ ਵੀ ਕੀਤੀ ਜਾਂਦੀ ਹੈ।
ਗਰਭਵਤੀ ਔਰਤਾਂ ਨੂੰ ਵੀ ਲੌਂਗ COVID ਹੋ ਸਕਦਾ ਹੈ। ਗਰਭ ਅਵਸਥਾ ਦੌਰਾਨ ਅਤੇ ਬਾਅਦ ਵਿੱਚ ਹੋਣ ਵਾਲੇ ਲੌਂਗ COVID ਦੇ ਪ੍ਰਭਾਵਾਂ ਬਾਰੇ ਅਜੇ ਵੀ ਅਧਿਐਨ ਕੀਤੇ ਜਾ ਰਹੇ ਹਨ।
ਲੌਂਗ COVID ਅਤੇ ਨੌਜਵਾਨ
ਨੌਜਵਾਨ ਵੀ ਲੌਂਗ COVID ਦੇ ਸ਼ਿਕਾਰ ਹੋ ਸਕਦੇ ਹਨ। ਜਿਹੜੇ ਨੌਜਵਾਨ ਅਕਸਰ ਥਕਾਵਟ ਮਹਿਸੂਸ ਕਰਦੇ ਹਨ ਜਾਂ ਜਿਹਨਾਂ ਨੂੰ ਧਿਆਨ ਕੇਂਦਰਿਤ ਕਰਨ ਵਿੱਚ ਮੁਸ਼ਕਲ ਆਉਂਦੀ ਹੈ, ਉਹਨਾਂ ਲਈ ਸਕੂਲ ਅਤੇ ਹੋਰ ਗਤੀਵਿਧੀਆਂ ਵਿੱਚ ਹਿੱਸਾ ਲੈਣ ਔਖਾ ਹੋ ਸਕਦਾ ਹੈ। ਇਹ ਵੀ ਹੋ ਸਕਦਾ ਹੈ ਕਿ ਛੋਟੇ ਬੱਚੇ ਆਪਣੇ ਲੱਛਣਾਂ ਦਾ ਚੰਗੀ ਤਰ੍ਹਾਂ ਵਰਣਨ ਨਾ ਕਰ ਸਕਣ।
ਲੌਂਗ COVID ਨਾਲ ਜੂਝ ਰਹੇ ਬੱਚੇ, ਫੈਡਰਲ ਕਾਨੂੰਨਾਂ (ਅੰਗਰੇਜ਼ੀ) ਦੇ ਤਹਿਤ ਵਿਸ਼ੇਸ਼ ਸਿੱਖਿਆ, ਸੁਰੱਖਿਆ ਜਾਂ ਸੰਬੰਧਿਤ ਸੇਵਾਵਾਂ ਲਈ ਯੋਗ ਹੋ ਸਕਦੇ ਹਨ।
ਨੌਜਵਾਨਾਂ ਨੂੰ COVID-19 ਦੀ ਵੈਕਸੀਨ ਲਗਵਾਉਣਾ, ਉਹਨਾਂ ਨੂੰ ਲੌਂਗ COVID ਤੋਂ ਬਚਾਉਣ ਦਾ ਸਭ ਤੋਂ ਵਧੀਆ ਤਰੀਕਾ ਹੈ। COVID-19 ਵੈਕਸੀਨਾਂ ਬਾਰੇ ਇੱਥੇ ਹੋਰ ਜਾਣੋ।
ਭਾਈਚਾਰੇ ਲਈ ਸਰੋਤ
- ਲੌਂਗ COVID ਬਾਰੇ ਬੁਨਿਆਦੀ ਗੱਲਾਂ (CDC)
- ਲੌਂਗ COVID ਦੇ ਨਾਲ ਜੀਵਨ ਬਿਤਾਉਣਾ (CDC)
- ਖੁਦ ਨੂੰ ਲੌਂਗ COVID ਤੋਂ ਬਚਾਓ: ਵੈਕਸੀਨ ਲਗਵਾਓ (PDF) (ਅੰਗਰੇਜ਼ੀ)
- ਪੋਸਟ-COVID ਰੀਹੈਬੀਲੀਟੇਸ਼ਨ (UW ਮੈਡੀਸਨ) (ਅੰਗਰੇਜ਼ੀ)
ਡਾਕਟਰਾਂ ਅਤੇ ਜਨਤਕ ਸਿਹਤ ਲਈ ਸਰੋਤ
- ਰਿਕਵਰ: ਰਿਕਵਰੀ ਨੂੰ ਵਧਾਉਣ ਲਈ COVID ਦਾ ਸੋਧ ਕਰਨਾ (ਅੰਗਰੇਜ਼ੀ)
- ਲੌਂਗ COVID ਬਾਰੇ ਕਲੀਨੀਕਲ ਸੰਖੇਪ ਜਾਣਕਾਰੀ (CDC) (ਅੰਗਰੇਜ਼ੀ)
- ਲੌਂਗ COVID ਲਈ CDC ਵਿਗਿਆਨ ਅਤੇ ਜਨਤਕ ਸਿਹਤ ਦਾ ਦ੍ਰਿਸ਼ਟੀਕੋਣ (ਅੰਗਰੇਜ਼ੀ)
- ਲੌਂਗ COVID ਹਾਊਸਹੋਲਡ ਪਲਸ ਸਰਵੇਖਣ (CDC) (ਅੰਗਰੇਜ਼ੀ)
- Power of Providers (POP, ਪਾਵਰ ਆਫ਼ ਪ੍ਰੋਵਾਈਡਰਜ਼) ਵੈਬਿਨਾਰ (ਅੰਗਰੇਜ਼ੀ)
- ਵਾਸ਼ਿੰਗਟਨ ਰਾਜ ਵਿੱਚ ਪੋਸਟ-COVID-19 ਸਥਿਤੀ ਦੇ ਬੋਝ ਅਤੇ ਵੰਡ ਦਾ ਅੰਦਾਜ਼ਾ ਲਗਾਉਣਾ, ਮਾਰਚ 2020–ਅਕਤੂਬਰ 2023 (CDC) (ਅੰਗਰੇਜ਼ੀ)
- ਲੌਂਗ COVID ਦੀ ਪਰਿਭਾਸ਼ਾ (2024) (National Academies of Sciences, Engineering, and Medicine) (ਅੰਗਰੇਜ਼ੀ)
- ਅਧਿਕਾਰ ਖੇਤਰ ਦੇ ਅਨੁਸਾਰ ਬਾਲਗਾਂ ਵਿੱਚ ਲੌਂਗ COVID ਅਤੇ ਗੰਭੀਰ ਲੌਂਗ COVID–ਸੰਬੰਧੀ ਗਤੀਵਿਧੀ ਦੀ ਸੀਮਾ — ਸੰਯੁਕਤ ਰਾਜ ਅਮਰੀਕਾ, 2023 (CDC) (ਅੰਗਰੇਜ਼ੀ)
ਸਹਿਭਾਗੀਆਂ ਲਈ ਸਰੋਤ
- ਖੁਦ ਨੂੰ ਲੌਂਗ COVID ਤੋਂ ਬਚਾਓ: ਵੈਕਸੀਨ ਲਗਵਾਓ (ਅੰਗਰੇਜ਼ੀ) (PDF)
- 120-066 - ਲੌਂਗ-COVID "4 P" ਪੋਸਟਰ - 8.5x11 - ਜੂਨ 2023 (wa.gov) (ਅੰਗਰੇਜ਼ੀ)
- California Department of Public Health (ਕੈਲੀਫੋਰਨੀਆ ਜਨਤਕ ਸਿਹਤ ਵਿਭਾਗ) ਵੱਲੋਂ ਸੰਚਾਰ ਟੂਲਕਿੱਟ (ਅੰਗਰੇਜ਼ੀ ਅਤੇ ਸਪੈਨਿਸ਼)। ਸੋਸ਼ਲ ਮੀਡੀਆ ਦੀਆਂ ਤਸਵੀਰਾਂ ਸ਼ਾਮਲ ਹਨ।